«Бояд тазаккур дод, ки ҳамаи автомашинаҳои нишондодашуда руйхати алоҳида дошта, ягонтои он ба номи аъзоёни Ҳукумати ҷумҳурӣ ва хешовандони наздик ба Президенти Ҷумҳурии Тоҷикистон ба қайд гирифта нашудаанд.”- ин нуктаро ВКД бо нашри як баёния дар сомонаи расмии худ иброз намудааст.
Дар баёнияи мазкур омадааст, ки аз соли 2011 то инҷониб, ҳангоми бақайдгирии воситаҳои нақлиётие, ки ба Ҷумҳурии Тоҷикистон ворид карда мешавад,127 далели ворид намудани автомашинаҳои рабудашуда ба қайд гирифта шудааст, ки57-тои он аз ҳудуди Олмон мебошад. Аммо бояд қайд намуд, ки автомашинаҳои нишондодашуда бо системаиGPSбаъд аз 2-3 моҳ ва баъзан баъди ним сол ва зиёда аз ин ба қайди кофтуков дохил шуданд, яъне аз тарафи Олмон ҳангоми дар қайд гузоштани нақлиёти рабудашуда, ба кашолкорӣ роҳ додаанд.
ВКД аз навиштаи нашрияи “Bild”изҳори нигаронӣ карда менависад: “Бо навиштаисомонаҳои интернетӣ мақолаҳое интишор шудааст, гӯё дар Ҷумҳурии Тоҷикистон тақрибан 200 адад автомашина, асосан тамғаи BMW, ки аз Олмон рабуда шуда буданд, дарёфт гардиданд. Муаллифон бо такя ба мақолаи дар рӯзномаи олмонии Bild ба чопрасида, қайд мекунанд, ки автомашинаҳои рабударо дар ҳудуди Тоҷикистон ба воситаи системаи GPS ошкор кардаанд.”
Ҳамчунин ВКД мегӯяд: “Ҳамаи коргузорӣ, ҳамкории байнидавлатӣ ва байнимақомотӣ ба воситаи ба имзо расонидани шартномаҳои дуҷониба яъне дар асоси заминаи ҳуқуқӣ амалӣ карда мешавад. Аммо миёни Тоҷикистон ва Олмон ягон ҳуҷҷати ба имзорасида дар ин самт, вуҷуд надорад ва механизми дастгир кардан ва баргардонидани наклиёти рабудашуда пешбинӣ нашудааст. Бо ташаббуси роҳбарияти вазорати корҳои дохилӣ бақайдгирии автомобилҳои нишондодашуда ва хариду фурӯши онҳо маҳдудият гузошта шудааст. Бинобар ин шаҳрвандон нисбати ин маҳдудият ба суд муроҷиат намуда эътироз оварданд, ки дар вақти харид ва ба қайд гузоштан, автомашина дар кофтуков қарор надошт. Мақомоти судии Ҷумҳурии Тоҷикистон муроҷиати шаҳрвандонро баррасӣ намуда, 55 нафар соҳибони ин гуна автомобилҳоро харидорони поквиҷдон эътироф намуд, чунки онҳо ин моликиятро ба воситаи дасти сеюм ва чорум харидорӣ намуданд.”
Дар давоми 3 соли охир аз рӯи иттилооти баъзе расонаҳо аз ҳудуди Олмон зиёда аз 50 ҳазор воситаҳои нақлиёт рабуда шудааст.
Дар баёнияи мазкури Вазорати корҳои дохилаи кишвар омадааст: “Аз ҷониби мо лоиҳаи Созишнома байни Ҳукумати Ҷумҳурии Тоҷикистон ва Ҳукумати Ҷумҳурии Федеративии Олмон дар бораи ҳамкорӣ дар самти мубориза бо ҷинояткорӣ ва амният омода шуда, аз ҷониби Ҳукумати Ҷумҳурии Тоҷикистон пазируфта шуд. Дар моддаи 13-и ин лоиҳа мубориза бо дуздӣ ва гардиши ғайриқонунии воситаҳои нақлиёт дар миқёси байналмилалӣ дарҷ карда шудааст. Аммо то ҳоло ҷавоби расмӣ оиди лоиҳа ба суроғаи мо аз ҷониби Олмон ворид нашудааст.”
Ёдовар мешавем, ки 20-уми декабр рӯзномаи олмонии “Bild” мақолае навишта буд, ки бо мошинҳои дуздидашуда аз Олмон наздикони Президенти Тоҷикистон Эмомалӣ Раҳмон гашту гузор мекунанд.
