Зайд Саидов, соҳибкори муваффақи боздоштшуда дар мурофеъаи судии имрӯз, 11-уми декабри соли 2013 суханони ниҳоии худро иброз дошта, гуфт, ки агар зиндоншавии ӯ ба фоидаи миллат ва давлат бошад, бигзор ҳабс шавад.
Ӯ зимни суханони ниҳоиаш дар мурофеъаи судӣ ҳама гуна туҳматҳое, ки ба ӯ нисбат дода шудааст, рад карда, худро бегуноҳ ҳисобид. Қарор аст, суд ҳукми ӯро содир кунад.
Дирӯз, 10-уми ноябри соли 2013 Шуҳрат Қудратов, яке аз вакилони Зайд Саидов ба хабарнигорон гуфта буд, ки суди ниҳоии Зайд Саидов ба 11-уми ноябр ба таъхир уфтод, то барои суханони ниҳоиаш омодагӣ бигирад.
Ҳамчунин оқои Қудратов аз луқмапартоии Абдусамеъ Додобоев изҳори нигаронӣ карда, гуфта буд, ки бо луқмапартоиаш раванди мурофеаро халалдор кард. Ӯ афзуд: “Исҳоқ Табаров, ки яке аз вакилони дифоъи Зайд Саидов мебошад, ҳангоми баромадаш дар мавриди таҷовӯз сухан мекард, аз ҷониби айбдоркунандаҳои давлатӣ Абдусамад Додобоев ва Неъматов луқмапартоӣ шуд.”
Оқои Қудратов раванди мурофеъаи имрӯзаро чунин шарҳ дод: “Мо дар баромади худ аз суд сафедкардани зерҳимояи худ аз ҳар туҳматро талаб кардем. Дар вақти тафтишоти судӣ аз тарафи мо ба ҳар як айби эълоншуда ба Саидов ҳуҷҷатҳо нисбати бегуноҳии ӯ пешниҳод карда шуд. Бо ҳамин сабаб, мо аз суд хоҳиш кардем, ки ба ҳама ҷиноятҳое, ки Саидовро гунаҳкор кардаанд, сафед карда шавад ва аз толори судӣ озод карда шавад.”
Ин дар ҳолест, ки Абдусамеъ Додобоев, айбдоркунандаи давлатӣ зимни баромади худ санаи 5-уми декабр аз додгоҳ талаб карда буд, то Зайд Саидовро ба муҳлати 28-сол аз озодӣ маҳрум гардонад. Ин талаби 28-соли Абдусамеъ Додобоев дар ҳолест, ки Зайд Саидов соҳибкор ва роҳбари боздоштшудаи гурӯҳи ташабускор барои таъсиси ҳизби “Тоҷикистони нав”-ро бо 5 иттиҳом гунаҳкор мекунанд ва 5 иттиҳоми дигари ин боздоштшуда ҳанӯз исбот нашуда, дар ҳоли баррасӣ қарор доштааст. Илова бар ин, ин айбдоркунандаи давлатӣ талаб карда буд, ки пас аз адои давраи ҷазо Зайд Саидов ба муддати 5 сол аз фаъолияти соҳибкорӣ низ маҳрум шавад.
Ба эътиқоди ҳолдонон, Зайд Саидов, соҳибкори машҳури кишвар маҳз ба хотири эълони тасмими гурӯҳи ташаббускор барои таъсиси ҳизби ҷадиди “Тоҷикистон нав”, ки роҳбарии ин гурӯҳро ӯ бар уҳда дошт, мавриди таъқиб ва фишор қарор гирифт ва баъдтар ӯро бо туҳматҳои мухталиф муттаҳам карданд ва интизор меравад, ки рӯзҳои наздик ҳукми ниҳоии суд нисбат ба ӯ содир шавад.
