Таҷрибаи низоми демократии Туркия барои ҳамаи миллатҳо, ба хусус мо тоҷикон хеле омӯзанда ва муфид аст, гуфт, зимни мулоқоти худ М. Кабирӣ, раиси ҲНИТ бо ҷаноби Мехмет Мунис Дирик, сафири Ҷумҳурии Туркия дар Тоҷикистон, ки ҳафтаи гузашта дар бинои сафорати Туркия дар Душанбе баргузор гашт.
Дар идома ҷонибҳо андешаҳои худро дар бораи робитаҳои ду кишвар иброз дошта, роҷеъ ба равандҳои сиёсии Тоҷикистон ҳарф заданд. Ҷонибҳо аз равобити мутаносибан судманд барои ҳар ду миллат изҳори қаноатмандӣ намуда, таъкид бар он карданд, ки вуҷуди муштаракот байни миллатҳо робитаҳоро бо ҳам наздиктару росихтар мегардонад.
Ҷаноби Мехмет Мунис Дирик гуфт, сафорат чунин мулоқотҳоро бо дигар қишрҳои ҷомеаи Тоҷикистон, бахусус аҳзоб ва созмонҳои ҷомеаи шаҳрвандӣ баргузор мекунад. Ва дар доираи ҳамин барнома робита бо ҲНИТ-ро ба унвони яке аз аҳзоби фаъоли ҷомеаи Тоҷикистон хеле муҳим мешуморад.
Дар фарҷом ҷонибҳо изҳори умедворӣ намуданд, ки равобити иқтисодиву иҷтимоӣ ва фараҳангӣ байни ду кишвари ба ҳам дӯст густариш хоҳад ёфт.
