nahzat.tj
Ҳудуди як сол пеш аз ин, ки артиш дар Миср қудратро ба даст гирад, Муҳаммад Мурсӣ дар яке аз деҳаҳои Далтои вилояти Шарқияи Миср таваллуд шуда, ба ҳукми тақдир аввалин президенти кишвараш мебошад, ки ба иродаи ҳақиқии мардум интихоб гардид. Аммо ӯ ва Мисрро рақобат бо нуфузи артиш дар интизор аст.
Муҳаммад Муҳаммад Мурсӣ Исо ал-Айот, маъруф ба Муҳаммад Мурсӣ дар деҳаи Удва, тобеъи маркази Ҳиҳёи вилояти Шарқия, шимол-шарқи Қоҳира аз падари деҳқон ва модари хонашин соли 1951 мутаваллид шуда, ҷавонияшро дар ҳамин деҳа гузарондааст. Ӯ фарзанди калонии хона буда, ду хоҳар ва се бародар дорад. Падару модараш фавтидаанд.
Мактаби миёнаро дар ҳамин вилоят бо баҳои аъло хатм ва Қуръони каримро пурра ҳифз карда, ба пойтахти Миср рафта, ба факултаи муҳандисаи Донишгоҳи Қоҳира дохил мешавад. Соли 1975 донишгоҳро бо баҳои аъло ва бо дараҷаи шараф дар соҳаи инженерӣ хатм карда, ба ҳайси устод дар ҳамон донишгоҳ тадрис мекунад. Соли 1975 ва 1976 дар артиш ҳамчун сарбоз хидмат мекунад.
Баъди бозгашт аз артиш дубора кори худро ҳамчун устод дар ҳамон донишгоҳ давом дода, соли 1978 магистратураро дар тахассуси худаш (муҳандисӣ) мегирад. Баъди чанд муддат ӯ сазовори бурси дониш аз Донишгоҳи ҷануби Калифорнияи Амрико гардида, аспирантура ва дипломи докторӣ (1982) дар соҳаи инженериро аз ҳамин донишгоҳи байналмилаллии амрикоӣ ноил мешавад.
Ҷаноби Мурсӣ ҳамчун устод дар чанд донишгоҳи амрикоӣ, аз ҷумла Донишгоҳи ҷануби Калифорния, Лос Анҷелес ва ғайра муддате кор мекунад. Баъди он фаъолияти худро ҳамчун устод дар Донишгоҳи Қоҳира ва сипас дар Донишгоҳи Фотеҳи Либия ва дар охир ҳамчун декани факултаи ҳандаса (инженерӣ) дар Донишгоҳи ал-Зақозиқ давом медиҳад.
Ӯ 30 ноябри 1978 издивоҷ карда, соҳиби панҷ фарзанд (Аҳмад, Шаймо, Усома, Умар ва Абдуллоҳ) ва се набера мебошад.
Фаъолияти сиёсӣ
Ҷаноби Мурсӣ фаъолияти сиёсии хешро ҳамчун узви ҷамоати Ихвон-ул- муслимин соли 1977, яъне, замони устодияш дар Донишгоҳи Қоҳира шурӯъ карда, тавонист узви шӯъбаи сиёсии ин ҷамоат аз замони таъсисаш дар соли 1992 гардад. Сипас ӯ узви Идораи иршод – баландтарин ниҳоди тасмимгиранда дар ҷамоат интихоб шуд.
Аз соли 2000 то 2005 (замони ҳукумати Муборак) ҳамчун вакили парлумон барои як давра интихоб гардид. Фраксияи парлумонии Ихвонул муслимин дар парлумонро раҳбарӣ карда, ӯро ба хотири фаъолияти парлумонияш дар ин муддат ҳамчун «беҳтарин вакил дар ҷаҳон» интихоб карданд. Дар давраи аввали интихоботи парлумонии 2005 аз рақибаш хеле зиёд овоз гирифт, аммо дар давраи дувум рақибаш (бо тақаллуб) пирӯз эълон шуд.
Мурсӣ тавассути чандин дархостҳои судӣ аз ҳукумати кишвараш ҳамчун шахсияти деҳқони суханвар дар таърихи фиръавнӣ (замони Муборак) дар раъйи омми мисрӣ шуҳрат пайдо карда буд.
Шикояташ ба Фиръавн (Муборак) аз ҳокими минтақа, ки дороияшро гирифта буд ва ба вижа рафъ кардани қазияи зери оташ рафтани қатораи Саъид бо садҳо мусофираш ба маҳкама, заъф ва ноӯҳдабароии ҳукуматро дар муҳайё кардани камтарин ҳадди василаҳои амниятӣ дар қатораҳое, ки камбизоату камбағалонро мекашанд, нишон дод.
Мардуми Миср ӯро аз солҳои навадуми қарни гузашта, вақте ки дар таъсиси Комиссияи муқовимат ба Саҳюнизм ширкат варзид, мешиносад. Ӯ ҳамчун намояндаи исломиҳо дар ин комиссияе, ки иборат аз гурӯҳҳо ва ҷунбишҳои сиёсии мухталиф мисли миллатгароҳо ва марксистҳо ва ғайра буд, ба шумор мерафт. Инчунин ӯ узви Конгресси байналмилаллии ҳизбҳо, нирӯҳои сиёсӣ ва иттифоқҳои касаба интихоб шуд.
Оқои Мурсӣ дар таъсиси Ҷунбиши миллӣ барои тағйир бо доктор Азиз Сидқӣ соли 2004, дар таъсиси Ҷамъияти ватанӣ барои тағйир бо ҳамроҳии доктор Муҳаммад Бародаъӣ (номзади ноком дар интихоботи президентии ахир) соли 2010 ва инчунин дар бунёди Эътилофи демократӣ ба хотири Миср, ки 40 ҳизб ва ҷунбишҳои сиёсиро дар бар мегирифт, соли 2011 ширкат варзид.
Маҷлиси шӯрои Ихвонул муслимин 30 апрели 2011 Мурсиро раиси Ҳизби озодӣ ва адолат, ки онро ҷамоати Ихвонул муслимин таъсис дода буд, интихоб кард.
Аз маҳбас то президентӣ
Ҷаноби Муҳаммад Мурсӣ дар замони ҳукумати Муборак чандин бор боздошт шудааст. Ӯ соли 2006 дар як музоҳироти мардумӣ, ки ба хотири маҳкум кардани интиқоли ду судя ба Шӯрои Салоҳия ба сабаби мавқеъгирии ишон аз ношаффоф гузаштани интихоботи парлумонии 2005 ширкат меварзид, боздошт шуда, 7 моҳро дар маҳбас гузаронид.
Инчунин, 28 январи 2011 дар рӯзи ҷумъаи «Ғазаб» дар авҷи қиёми мардумӣ, ки режими Муборакро сарнагун кард, бо ҳамроҳии 34 нафар аз раҳбарияти Ихвонул муслимин барои ҷилавгирӣ аз ширкат дар ин рӯз дар маҳбаси «Водии Натрун» боздошт шуд ва 30 январи 2011 (яъне баъди ду рӯз) мардуми эътирозгар баъди ин ки нирӯҳои амниятӣ ин маҳбасро тарк карданд, онҳоро озод карданд.
Оқои Мурсӣ номзади аввали ихвониҳо барои мақоми президентӣ набуд, балки номзадии ӯ ҳамчун номзади эхтиётӣ ва ивазкунандаи Хайрат Шотир пешбарӣ шуд. Дар интихоботи дохилӣ байни раҳбарияти Ихвонул муслимин Мурсӣ ҷои дувумро баъди Хайрат Шотир (ноиби аввали муршиди кулли Ихвонул муслимин) ноил гашт. Аммо Шӯрои интихоботи президентӣ Шотир, номзади асосии ихвониҳоро зимни номзадҳое, ки ин шӯро онҳоро аз рақобат дар интихоботи президентӣ маҳрум кард, дарҷ кард ва дар натиҷа, Мурсӣ номзади асосии ихвониҳо шуд.
Сафкашии интихоботӣ
Муҳаммад Мурсӣ дар давраи аввали интихоботи президентӣ, ки рӯзҳои 24 ва 25 майи 2012 баргузор гардида буд, аз байни 13 номзад бештарин овозҳоро (5 764 952 овоз) касб кард, аммо ин овозҳо барои пирӯзӣ ба мақоми президентӣ кофӣ набуд, зеро ӯ 50% + 1 овозҳоро касб накарда буд. Барои ҳамин, дар давраи дувуми интихоботи раёсатҷумҳурӣ бо Аҳмад Шафиқ, охирон сарвазир дар замони Муборак, ки мақоми дуюмро дар давраи аввал гирифта буд, рақобат кард.
Пеш аз маъракаи давраи дувум ӯ тавонист нирӯҳои исломӣ, ки Абулфатуҳ (номзади ноком)-ро таъйид карда буданд ва инчунин чандин нирӯҳои инқилобӣ, аз ҷумла Ҳаракати 6 апрел, Эътилофи инқилобиёни Мисрро баъди додани баъзе аз замонатҳо ба онҳо ба худ ҷалб намуд. Ин ҳам ба хотири он ки ӯ номзади ягонаи инқилоб дар давраи дуюм буд.
Рӯзи якшанбе 24 июни 2012 Шӯрои интихоботи раёсатҷумҳури Миср эълон кард, ки Муҳаммад Мурсиро дар давраи дуюми интихоботи президентӣ бо касби 51.7% пирӯз эълон намуд.
Мурсӣ баъди таъкиди пирӯзияш расман истеъфои худро аз раисии Ҳизби озодӣ ва адолат ва инчунин аз узвияти ҷамоати Ихвонул муслимин эълон кард.
Манбаъ: “ал-Ҷазира”
