Зокир, яке аз назарнависони сомона
Ба Мавлавӣ (?) ва касоне, ки мегӯянд дар Ислом ҳизб нест!
Шумо бисёр пардапушона суҳбат мекунед, зеро вақте мегӯед дар Ислом ҳизб нест, мантиқан ин масъала бояд ҳамаи ҳизбҳои дар Тоҷикистон бударо дарбар гирад, чунки ҳамаи аъзои ҳизбҳои ТҶ ва раисонашон мусалмон ҳастанд. Пас, мантиқ ин мешавад, ки онҳо низ набояд ҳизб дошта бошанд.
Дуввум, ин ки маъмулан касоне, ки иродаи мустаҳкам надоранд, ҳамеша ҳамчун бозича мавриди бозии дигарон қарор мегиранд ва ҳеч кас ба онҳо бовар намекунад. Масалан, ҳамин Мавлавӣ замоне бо ғайри наҳзатиҳо буд, баъд бо наҳзатиҳо пайваст ва имрӯз на танҳо наҳзат, балки тамоми мусалмонҳои аъзои ҳизбҳои сиёси ҳатто ҲХДТ ва ҲКТ ва ҲУСДТ ва ҲДТ ва ҳатто мусалмонҳои дигар кишварҳоро бо ин мантиқаш таҳқир мекунад! Пас, аз куҷо маълум, ки фардо боз ба манфиати ягон гуруҳи дигаре баромад накунад?!
Мақомоти Тоҷикистон ба худи Мавлавӣ бовар надоранд, зеро одами оқил агар андеша кунад, мефаҳмад, ки касе, ки ҳамсафҳои худро таҳқир мекунад, ҳатман рӯзе боз душмани онҳо хоҳад шуд!
Аҷоибаш ин аст, ки агар дар Ислом ҳизб набошад, пас чаро ин гуруҳи калони Кумитаи дин фақат бар зидди ҲНИТ пропаганда мебаранд? Агар даъвои Шумо дуруст бошад, чаро Президентро намегӯед, ки дар Ислом ҳизб нест? Ва мантиқан ҲХДТ бояд барҳам дода шавад? Магар аъзои ҲХДТ мусалмон нестанд?!
Пас, чаро онҳо ҳизб таъсис дода ва аъзои ҳизбе шудаанд? Магар пайвастшавии онҳо ба ҲХДТ фитнаро ба вуҷуд намеорад? Ё онҳо аз ягон сайёра ва ё кишвари дигаре ҳастанд?
Як аҷоиби дигараш ин ки чаро Кумитаи дин ин корро карда истодааст? Магар кумитаи дин дар Тоҷикистон танҳо бо дини Ислом сару кор дорад ва ё бояд бо ҳамаи динҳо сару кор дошта бошад? Аслан Кумитаи динро бо ин баҳс чӣ кор?
Магар дар салоҳияти Кумитаи дин аст, ки бояд ингуна баҳсҳоро сарварӣ кунад? Дар куҷои қонун омадааст, ки Кумитаи дин бояд бар зидди як ҳизб ё ақидаи як гуруҳе, ки ҳизб таъсис дода ва узви он шудаанд, таблиғ кунад?
Инҳо танҳо як чизро равшан мекунанд ва он ин аст, ки интихобот дар пеш аст ва Ҳукумату чиновникҳояш аз ҳар имконоту василаҳо, ҳатто бештар аз роҳҳои ғайриқонунӣ ва зидди Сарқонун мисли фишорҳо бар зидди ҳизбҳое, ки метавонанд таъсири худро дар ҷараёни интихобот расонанд, истифода карда истодаасту вассалом!
Зарари ин амалкардҳо дар он аст, ки худи мақомот ва намояндаҳои ҳукумат ба мардум чи гуна баромадан аз чаҳорчуби қонун ва аз роҳҳои ғайриқонунӣ амал карданро нишон дода истодаанд.
Агар ҷавонон ба ҷараёнҳои ғайриқонунӣ ва экстремистӣ пайваст шаванд, набояд аз дигарон нолид, балки бояд аз худатон гила кунед ва онро дар амалҳои ноҷо, носанҷида ва ношоистаи худатон ҷустуҷу намоед. Зеро ин мардум ва ҷавонони раҳгумкарда ба худ хоҳанд гуфт, ки агар намояндаҳои ҳукумат ва Кумитаи дин аз салоҳияти худ баромада, қонунҳоро поймол мекунанд, пас чаро ман маҷбур ва маҳкум ба итоат аз қонун бошам?
Ман аз бегонагон ҳаргиз нанолам,
Ки бо ман ҳарчи кард, он ошно кард!
