Рӯзи барканории А. Достиев ҳам расид

Бешак, ҳар нафаре бо мурури вақт ва воқеъияту равандҳои зиндагӣ ё ба таври табиъӣ ё сохта болои курсӣ менишинад ва зимоми кореро ба даст мегирад, вале боз ҳам дар вақти дигаре аз ин ҳолат барканор мешавад ё бо сабабҳои дигар курсиро холӣ мекунад. Бисёр муҳим аст, агар инсон ба таври табиӣ ба чунин як курсӣ бинишинаду аз нигоҳи равонӣ ва ҷисмонӣ хидматгори миллати худ бошад, чун рафтанаш аз чунин курсӣ ҳатмист.
Бале, рӯзгор барои ҷаноби Абдумаҷид Достиев чунин омад, ӯ бо мурури вақт дар курсиҳои зиёде такя зад ва нуқтаи кулминатсионии он ба баргузории иҷлосияи 16-уми «овозадор»-и Шӯрои Олии вақти Тоҷикистон рост омад, ки дар он ба курсии муъовинати аввал дар раёсати Шӯрои Олӣ расид.
Баъд аз созиши сулҳи тоҷикон салоҳияти Маҷлиси Олӣ то ҷое тағйир ёфт ва Маҷлиси намояндагон ном гирифт. Ҷаноби Достиев дар ин симмат 15 сол фаъолият кард ва ӯро ҳамчун нафари калидӣ дар низоми давлатдорӣ ва элитаи ҳоким мешинохтанду эътироф мекарданд. Вале дар заминаи баъзе таҳавулотҳо дар долонҳои ҳукумат ҷаноби Э. Раҳмон лозим донист, ки Достиевро дар соли 2007 ба курсии дипломатӣ интиқол бидиҳад ва ӯро фиристод ба Маскав, то бо шарики стротежиаш назокати роҳкорҳои сиёсӣ ва иқтисодиро ҳамвор созад. Номбурда дар ин симмат ҳам 7 соли ҳаёташро пушти сар гузошт ва имрӯз агар коре ҳам карда метавонист, дигар нолозим шуморида шуда, ӯро барканор карданд ва ин хабарро худаш дар суҳбат бо радиои «Озодӣ» имрӯз, 15-уми май тайид кардааст.
Хуб, тамоми фаъолиятҳои ҷаноби Абдумаҷид Достиевро ба сифати мусбӣ ё манфӣ арзёбӣ кардан ғайриимкон аст, чун дар таҳлилу назарпардозиҳои коршиносону таҳлилгарон ишора аз ҷанбаҳои мухталифи фаъолияти ишон ҷой доранд. Вале то ҷое ӯро мешиносем, ӯ дар мавқеъгирӣ ва ҳадафи хеш собиту устувор буду новобаста аз оқибати кору ҳадаф ҳамин тавр боқӣ монд,.
Ҷои тазаккур аст, ки Абдумаҷид Достиев яке аз шахсиятҳои аслие буд, ки дар поягузории Ҳизби халқии Тоҷикистон саҳми бориз дошт ва ӯро ҳатто ба таври ғайрирасмӣ раиси он ҳам ном мегирифтанд. Чанд сол гузашту ин ҳизб дар радифи мафҳуми «халқӣ» мафҳуми дигар, «демократӣ»-ро ҳам зам карда, Ҳизби халқӣ-демократӣ ном гирифт.
Ҳамчунин бояд иқрор кард, ки ҷаноби А. Достиев дар курсии муъовинат дар КОМ ҳам ибтикору иқдомҳои хуберо пеш мегирифт ва дар баҳсу баррасии масоили калидӣ дар бисёр маврид бо назару мавқеи устод Сайид Абдуллоҳи Нурӣ, ҳамчун раиси КОМ мувофиқ буд.