Зайниддин Ҳаётов, раиси бахши ҲНИТ дар ноҳияи Хуросон ба сомонаи Наҳзат иттилоъ дод, ки тибқи дастури раиси ноҳияи Хуросони вилояти Хатлон бояд тамоми аъзоҳои ҳизбҳои сиёсӣ дар назди мақомот ба қайд гирифта шаванд.
Ба гуфтаи ӯ, “Дар ноҳияи мазкур маро ба ҳукумат даъват карданд. Ман вақте ба он ҷо рафтам, ба ман гуфтанд, ки тибқи таҳлил аз 638 нафар аъзои ҲНИТ дар ноҳияи Хуросон, 161 нафарашон аз ҳизб баромаданд ва 11 нафари дигар дар Русия қарор доранд, вале ба ҳар ҳол аъзоёни шумо фалшивӣ мебошанд.”
Ин ҳам дар ҳолест, ки Аҳмад Ҳасанов, яке аз аъзоёни ҳизб дар ин ноҳия гуфт: “Ба мо гуфтанд, ки кумакпулӣ медиҳем ва барои ягон ҷо сафар кардан маблағ ҳам бароятон медиҳем, ба шарте ки аз ҳизб бароед.”
Зайниддин Ҳаётов сабаби дигари ихроҷ шудани аъзоёнро дар фишорҳои пайдарпайи мақомот мебинад, ӯ мегӯяд: “Бештари аъзоёне, ки мехоҳанд аз ҳизб бароянд, аз суҳбат кардан худдорӣ мекунанд. Фикр мекунам, ки онҳо зери фишорҳои мақомот ҳастанд.”
Чанде пеш масъулини ҲНИТ гуфтанд, ки мақомоти ҳокимияти давлатӣ истифода аз имконоти дар дастдошта, харитаҳои сиёсии минтақаҳову маҳалҳои кишварро низ таҳия карданд ва акси харитаи сиёсии шаҳри Конибодоми вилояти Суғд, ки дар сомонаи Наҳзат дар таърихи 7-уми сентябри соли ҷорӣ нашр гардидааст, шоҳиди ин иддаъо мебошад.
Масъулини ҳизб мегӯянд, ки бар асоси банди мазкур моҳҳои ахир таъқибу фишори аъзои ҲНИТ ва поймолсозии ҳуқуқҳои конститутсионии онҳо ба авҷи аъло расидааст.
Онҳо талаби мақомот барои ҷамъи руйхати пурраи аъзои ҳизб дар минтақаву маҳалҳоро ба банди 2-и Протоколи 32-20, ки аз тарафи Президенти ҶТ Эмомалӣ Раҳмон дар санаи 24-уми ноябри 2011 тасдиқ шудааст, рабт медиҳанд. Дар ин банд чунин омадааст:
“2. Вазорати корҳои дохилӣ – Қаҳҳоров А. А., Кумитаи давлатии амнияти миллӣ – Ятимов С. С., Кумитаи оид ба корҳои дин – Холиқов А. Ғ. якҷо бо мақомоти иҷроияи маҳаллии ҳокимияти давлатӣ ва ҷалби имкониятҳои соҳибкорону фаъолони маҳалҳо харитаҳои сиёсии минтақаҳову маҳалҳои мамлакатро таҳия карда, фаъолияти Ҳизби наҳзати исломии Тоҷикистон, хусусан роҳбарону масъулони сохторҳои ибтидоии онро таҳти назорати қатъӣ ва доимӣ қарор дода, доир ба муайян кардани руйхати пурраи аъзои ҳизб ва маҳаллу суроғаи зисти онҳо, ошкор намудани тарзу усули кори таблиғотии ҳизб, инчунин оид ба пешбурди кори ҷиддӣ, аз ҷумла бо роҳи ҳавасмандгардонӣ аз сафҳои ҳизб кашидани онҳо чораҷӯӣ намоянд.” (Банди 2, Протоколи 32-20)
Манбаъ: Сомонаи Наҳзат
