Маҳмудҷон Файзраҳмонов
Ҷавоби наҳзатии 83-сола ба мақомоти маҳаллии Рашт: “Ман ҳечгоҳ зидди ҲНИТ баромад намекунам. Ман дар Наҳзат будам ва то рӯзе, ки зиндаам дар ин ҳизб мемонам.”
Имрӯз, 16 –уми августи 2013, Саидъалӣ Муҳаммадҷонов, раиси бахши ҲНИТ дар Рашт гуфт, ки мақомоти маҳаллии ноҳия як узви 83-солаи ҳизб дар шаҳраки Нуробод ва ду узви дигар дар ҷамоати Қалъанакро маҷбур карданд, ки дар барномаи ҳукуматие, ки фардо аз тариқи телевизионҳои давлатӣ пахш мешавад, алайҳи Ҳизби наҳзати исломӣ сухан гуянд, аммо онҳо шадидан ин “талаб”-и мақомоти маҳаллиро рад карданд.
mp3: Раиси бахши ҲНИТ дар бораи фишорҳо
Саидъалӣ Муҳаммадҷонов, раиси бахши ноҳиявии Ҳизби наҳзати исломии Тоҷикистон дар ноҳияи Рашт дар суҳбати телефонӣ ба сомонаи Наҳзат гуфт: “Ҳамин рӯз, раиси ноҳия як узви 83-солаи ҳизб Муҳаммадризо Вафоев, масъули иршод ва таблиғ дар ноҳияро фарёд мекунаду мегӯяд, пагоҳ ҷаласа дорем ва дар он муллоҳо ва имомхатибонро даъват кардаем, шумо дар назди мардум гуед, ки ман аз ин ҳизб баромадам ва ин ҳизб даркор нест. Вале ин марди пиронсол чунин ҷавоб додааст: Ман ҳечгоҳ зидди ҳизб баромад намекунам ва чунин суханҳоро намезанам ва дар Наҳзат будам ва то рӯзе, ки зиндаам дар ин ҳизб мемонам. Ҳечгоҳ (Баъди шунидани ин, аз ғазаби зиёд) раиси ноҳия ӯро аз утоқаш меронад ва ҳамин тариқ нақша раиси ноҳия бекор мешавад.”
Сипас, раиси бахши ҲНИТ дар Рашт афзуд: “Боз ду нафар аз ҷамоати Қалъанак; яктояш муаллим ва дигараш шогирди ман аст, имрӯз ҳукумати маҳалли онҳоро фарёд кардааст. Шумо биоед интервию бидиҳед, ки мо аз Наҳзат баромадем, ҲНИТ уқа ҳизбе набудаст ва даркор ҳам нест ва мо дигар ба зиндагии худамон овора ҳастем. Вале онҳо ҳам гуфтанд, ки мо ҳечгоҳ аз Наҳзат намебароем ва ҳечгоҳ интервию намедиҳем. Мо аз Наҳзат даст намекашем ва то ҳаёте, ки ҳастем, мо дар ин ҳизб боқӣ мемонем.”
Ӯ низ қайд кард, ки ин ҳодисаҳо имрӯз (16.08.2013) то нисфирӯзӣ рух додаанд.
Ҷаноби Муҳаммадҷонов ҳамчунин иброз намуд: “Имрӯз Созмони амният ва ҳамкории Аврупо (САҲА) манро ҳамчун раиси бахши Ҳизби наҳзати Ислом фарёд карда буд. Мо бо роҳбарон ин созмон ба муддати 45 дақиқа ин мавзуъро баҳсу баррасӣ кардем. Масъулини ин созмон гуфтанд, ки ҲНИТ-ро ҳамчун ҳизби муътадил ва сулҳхоҳ эътироф мекунанд ва ин амалҳои мақомоти маҳаллиро ғайриқонунӣ хонданд. Роҳбарони САҲА рақамҳои моро гирифтанд ва гуфтанд, ки ҳар чизе рух дод, Худо нахоста, бо онҳо дар тамос бошем.”
Раиси бахши ҲНИТ дар Рашт инчунин гуфт: “ Мақомот натавонистанд (яъне онҳо дар мутақоид сохтани аъзои ҲНИТ барои баёнот алайҳи ҳизбашон дар шабакаҳои телевизионӣ додан, ноком шуданд). Шояд як ду нафари дигарро аз беруни Ҳизби наҳзат ҷалб кунанд, то ин ҳизбро (фардо дар барномаи телевизионӣ) сиёҳ кунанд.”
Дар охир ӯ гуфт: “Дар ҳаққи мо дуо кунед, ки (бовар кунед) дар таҳти фишори сахт қарор дорем.”
