Мижгона Ҳалимова
nahzat.tj
Модари Баҳромиддин Шодиев, як маҳбусе, ки ду сол қабл тибқи гуфтаи модараш бар асари шиканҷа дар шӯъбаи милисаи пойтахт фавтида буд, 180 ҳазор сомонӣ ҷубронпулӣ талаб кардааст.
Ниёзбӣ Бӯриева, модари Баҳромиддин Шодиев, ба Додгоҳи ноҳияи Шоҳмансур ариза навишта талаб кардааст, ки Вазорати корҳои дохилӣ барои ҷуброни зарари маънавӣ 180 ҳазор сомонӣ, ки ҳудуди 38 ҳазор доллари амрикоиро ташкил медиҳад, пардохт намояд.
Тавре Гулчеҳра Холматова, ҳимоятгари ҷониби ҷабрдида, ба ОИ «Азия-Плюс» хабар додааст, қарори суд 5-уми апрел мавриди амал қарор гирифта, дар сурати то ин замон шикоят наовардан ба он аз ҷониби ҷавобгар, ВКД маблағи ҷубронро бояд бипардозад.
Баҳромидин Шодиеви 28-сола моҳи октябри соли 2011 аз тарафи маъмурони милисаи ноҳияи Шоҳмансур бо иттиҳоми дуздӣ боздошт шуда ва пас аз даҳ рӯз дар беморхонаи Қарияи боло даргузашт.
Қаблан Савринисо Гулова, модари се фарзанд ва ҳамсари маҳбуси фавтида Исмоил Бачаҷонов, ки пас аз лату кӯб дар боздоштгоҳи муваққатии Вазорати адлияи ҶТ ҳалок шуда буд, аз Вазорати адлия пардохти 655 ҳазор сомонӣ ҷубронпулӣ талаб дошт. Вале ин вазорат ба ин зани тоҷик танҳо 30 ҳазор сомонӣ ҷубронпулӣ пардохтааст.
Бачаҷонов соли 2009 ба иттиҳоми қочоқи маводи мухаддир маҳкум ба зиндон шуда буд, дар соли 2011 дар яке аз маҳбасҳо дар асари шиканҷаи бераҳмонаи зиндонбонҳо даргузашт.
Ҳамчунин суд шикояти хонаводаи Сафаралӣ Санговро, ки дар боздоштгоҳ бар асари шиканҷа ба ҳалокат расида буд, қонеъ гардонида, Вазорати корҳои дохилиро ба пардохти маблағи наздик ба 47 ҳазор сомонӣ зарар муваззаф кард. Аризаи шикоятӣ барои ҷуброн намудани зарари моддӣ ва маънавӣ дар ҳаҷми 150 ҳазор сомонӣ аз ҷониби ҳамсари Сафаралӣ Сангов ироа шуда буд. Ӯ низ дар моҳи марти соли 2011 бо ҷароҳатҳои вазнин аз шӯъбаи дувуми милисаи ноҳияи Сино ба бемористон оварда шуду баъди 4 рӯз даргузашт. Пайвандонаш марги ӯро натиҷаи шиканҷа ва латукӯб медонанд.
Аз ин бар меояд, ки фаҳмиш ва шуури мардум нисбат ба талаби ҳуқуқҳояшон рӯз аз рӯз боло рафта, талаби ҷубронпулиҳо гувоҳи ин гуфтаҳост. Чунки дар Тоҷикистон то ин вақт ҳама арзу шикоятҳои шаҳрвандон ва шахси ҳуқуқӣ барои талаб намудани ҷуброн ё ин ки зарари расонда аз тарафи мақомоти давлатӣ беасос хонда мешуд ва бовар дорем, ки дигар чунин нахоҳад шуд.
