Имрӯз яке аз олимони раббонӣ ва мубаллиғони Ислом Домулло Абдушукур дар деҳаи Мирзочули наздикии Душанбе ба хок супурда шуд.
Дар маросими дафн роҳбарони ҲНИТ, олимони маъруф Эшони Нуриддинҷон, Ҳоҷӣ Абкар Тӯраҷонзода, Эшони Алломаи Регарӣ, Домулло Ҳақназар ва ҳазорон мухлисону шогирдони зиёди Домулло Абдушукур иштирок доштанд.
Маросимро Муҳиддин Кабирӣ, раиси ҲНИТ оғоз намуда,пас аз расонидани арзи тасаллият ба аҳли хонаводаи марҳум дар бораи саҳми шодравон Домулло Абдушукур, ки дар таъсис ва устувору густариш ёфтани ин шуъбаи ҳизб дар ноҳияи Ҳисор, ки эшон муддатҳо раиси он буданд ва ҳамчунин дар бораи хидматҳои эшон дар густариши Ислом ва тарбияи шогирдон суҳбат доштанд.
Оқои Кабирӣ таъкид ҳам карданд, ки мутаассифона, якчанд олимони Ислом дар айни нашъунамо реҳлат намуданд, зеро эшон ҳама гуна фишору азоб ва таъқибро махсусан, солҳои Шӯравӣ аз сар гузаронидаанд ва бесабаб нест, ки онҳо ғолибан бо сактаи қалбу сактаи мағз талаф мешаванд.
Эшони Нуриддинҷон низ аз гузашти Домулло Абдушукур ба хонаводааш сабри ҷамил дарҳоста, фавти домуллоро дар қатори Домулло Муҳаммадӣ, Домулло Муҳаммаднабӣ, Домулло Абдуфайёз яке аз мусибатҳои Исломӣ ҳисобида, хидматҳои Домулло Абдушукурро дар таълими шонирдон махсус таъкид намуданд.
Гуфтанд, ки бо вуҷуди маризӣ домулло аз таълими шогирдон даст намекашиданд. Ҳарчанд ҳалқаи таълимии эшон бо баробари фавташон аз байн рафт, шогирдони зиёд аз худ боқӣ гузоштанд, ки равиши эшонро идома хоҳанд дод. Имрӯз мо барои бародарамон Абдушукур, ки дар роҳи рушди Ислом хидматҳои беназир доштанд, ашк мерезем, изҳори таассуф карданд Эшони Нуриддинҷон.
