Бино бар гузориши сомонаи «Озодӣ» аз аввали соли 2011 дар Тоҷикистон қиммати неруи барқ барои аҳолӣ 20% ва барои корхонаҳои саноатӣ 25% афзоиш меёбад. Ба гуфтаи масъулони «барқи тоҷик» ин иқдом ба хотири арзон будани нархи барқ дар муқобили дигар маҳсулот ва ҷалби сармояи хориҷӣ барои иҷрои барномаҳои энержӣ мебошад.
Ин ба он маъно аст, ки аз ин ба баъд сокинони кишвар ба ҷои 9 дирам барои 1 киловат – соат неруи барқ 11 дирам пардохт мекунанд.
Аммо саволи матраҳ инҷост, ки оё ин роҳи ҳалли дуруст аст? Яъне бо дар назар гирифтани сатҳи зиндагӣ ва маоши миёнаи мардуми кишвар ин иқдом қобили қабул аст? Агар ҳадаф беҳбуди вазъи мардум бошад пас мардум аз ин ба баъд чигуна бояд ин пулро пардохт кунанд? Махсусан касоне, ки дар шаҳрҳо ва дар ошёнаҳои баланд зиндагӣ мекунанд, вале даромади чандоне надоранд. Набояд масъулон нисбат ба нигарониҳои мардум ҳам бетаваҷҷӯҳ бошанд. Зеро ҳадаф аз ин кор бояд беҳбуди зиндагии мардум бошад на чизи дигар.
Categories
Ахбори рӯз
