Умед Сиддиқ
nahzat.tj
Тибқи иттилоъи хадамоти матбуоти Палатаи савдо ва саноати кишвар рӯзи 5-уми июли соли равон, соати 10:00 то 17:00 дар меҳмонхони «Ҳайят Реҷенси»-и шаҳри Душанбе ҳамоиши доираҳои тиҷоратии Тоҷикистону Қазоқистон баргузор гардида, дар кори ҳамоиш намояндаҳои зиёда аз 20 ширкатҳои Қазоқистон, корхонаву ташкилотҳои ин кишвар бо технологияҳои навтарини худ ва ширкати Содиротӣ-қарзии «КазЭкспортГарант» иштирок хоҳанд кард.
Ба иттилоъи манбаъ, мақсад аз баргузории ин чорабинӣ густариш ва тақвияти робитаҳо барои афзоиш додани ҳаҷми муомилоти молӣ миёни давлатҳо ва рушди ҳамкориҳои тарафайн мебошад.
Инчунин дар доираи ин чорабинӣ намояндагони доираҳои тиҷоратии кишварҳо масъалаҳои ҷалби сармоягузорӣ, саноати нафту кимиё, мошинсозӣ, сохтмон, саноати хӯрокворӣ ва дигар масоили мавриди таваҷҷӯҳи ҷонибонро муҳокима менамоянд.
Ба маълумоти манбаъ феълан дар Тоҷикистон 47 ширкат бо дастгирии Қазоқистон фаъолият намуда истодаанд.
