Ҳамасола санаи 7-уми май дар кишвар чун Рӯзи радио ва
кормандони соҳаҳои алоқа таҷлил мегардад. Суоле ба миён меояд, ки то куҷо радиоҳои
Тоҷикистон воқеиятро инъикос мекунанд ва ё салоҳияти худро анҷом медиҳанд?
Нуриддин
Қаршибоев, раҳбари Анҷумани
расонаҳои мустақили Тоҷикистон (НАНСМИТ):Радио
махсусиятҳои кори худро дорад, вале ман мутмаъин нестам, ки дар маҷмуъ радио
рисолати ҳақиқии худро дар ҷомеаи Тоҷикистон ба анҷом расонда бошад? Манзурам,
набудани шабакаи сартосарии мустақили радио дар ҷумхурист. Шабакаҳои сартосарии
давлатӣ наҳамеша тавозуни назарро дар хабару гузоришҳои худ риоя мекунанд.
Радиоҳои мустақил, ки шумораашон қариб ба 20 ада мерасад, бештар тафреҳию мусиқӣ
буда, ҷанбаи иттилоотии онхо суст аст. Сарфи назар аз
ин, радио ҳамчун ВАО дар чанд соли охир рушд меёбад. Радио ҳамчун ВАО оинаи ҷомеа аст, он воқеияти кишвар дар он инъикос мегардад. Агар ҷурме дар фаъолияти он
бошад, аз адами гунонунандешӣ дар ҷомеа шаҳодат медиҳад.
Азиз
Нақибзод, сармуҳарири сомонаи Озодагон: Радиоҳо низ мисли дигар расонаҳо як
навъ маҳдудият доранд. Радиоҳои давлатӣ мисли расонаҳои давлатӣ танҳо ба
таърифу тавсифи ҳукумат машғуланд, чун аз ҷониби давлат маблағгузорӣ мешаванд,
табист, ки аз мушкилоту камбудиҳо намегӯянд. Радиоҳои хусусӣ то андозае аз воқеиятҳои
ҷомеа ҳарф мезананд, вале дар доираи муайян. “Радио Имрӯз” бештар аз воқеиятҳо
мегуфт, ба ибораи дигар марзҳои мавҷударо шикаста буд, шояд аз ин сабаб буд, ки
роҳбарияташро иваз намуданд.
Шараф
Хушҳолов, як шунаванда аз пойтахт: Агар бигӯем, ки умуман намедиҳанд шояд хатто
шавад! Ҳастанд баъзе барномаҳои проблемавӣ! Радио фақат барои мусиқӣ шунавонидан
нест! Бубинед агар мо гӯем, ки радиои рисолаташро дар расонидани маълумоти саҳеҳ ва таҳлиливу танқидӣ анҷом дода истодааст, пас Орзу Исоев куҷо шуд? Ин рӯзноманигорро барои гуфтаниҳарфи ҳақу рӯи рост танқид кардани мансабдорони
камсалоҳият аз “Радио” чунин ронданд, ки ҳоло наметавонад куҷое кор ёбад!
Алишер
Зарифӣ, рӯзноманигор: Дар маҷмуъ нақши радиоҳои Тоҷикистон дар инъикоси воқеияти
ҳаёти имрӯзаи ҷомеаи мо ба назар мерасад, вале он имконияти расонидани иттиллоъро,
ки радиоҳо доранд пурра истифода намебаранд. Зиёд ҳолатхое мешавад хабаре, ки
аз радио пахш мешавад аллакай 3 рӯз пеш аз дигар намуди ВАО пахш шудааст. Радиоҳо
вақтҳои ахир бештар ба барномаҳои мусиқӣ ва суҳбатҳои телефонӣ ё ирсоли смс-паёмак
дода шудаанд, ки дар ингуна барномаҳо баррасии мушкилоти ҷомеа кам ба назар мерасад.
Зарафо
Қаюмова, аз як деҳаи кишвар: Радиоро дар саҳро ҳангоми кор карданам гӯш мекунам
ва дар зимистон бошад доимо истифода мебарам, зеро барқ нест. Акнун, ки барқ
ҳаст дигар кам радиоро гӯш мекунам.
Зайнуддин
Орифӣ, рӯзноманигор: Имрӯз радиоҳо беҳтар оҳанги тиҷоратӣ доранд, чун воқеиятро
бештар “Радиои Имрӯз” инъикос мекард. Дар маҳалҳо радио танҳо чун василаи фароғату
мусиқӣ аст. Имрӯз ҳам “Радиои Имрӯз” аз воқеият дур нест, аммо чандсол пештар
ба воқеият наздик буд.
