nahzat.tj
Суолу ҷавоби фиқҳии бештар дар масоили мухталиф
Бахтиёр
388) Суол: Ҳадисеро хондам, ки навишта шуда буд: “Дар биҳишт ҷаннатиён ба забони арабӣ ва форсӣ сухан мегуянд.”
Академияи исломии ҲНИТ
Ҷавоб: Ассалому алайкум ва раҳматуллоҳ! Дар ин маврид дар Қуръон ва аҳодиси Паёмбар (с) далели сареҳе вуҷуд надорад, баъзе ривоёт вуҷуд дорад, ки забони аҳли биҳишро арабӣ баён намудааст. Аммо муҳаддисин баъзе ин ривоётро заъиф ва баъзеи дигар мавзуъ гуфтаанд. Аз қуръон барои мо собит шудааст, ки биҳиштиён сухан мекунанд ба ҳар шакле, ки Худованд хоста бошад.
****
Тоҷиддин
387) Суол: Баъд аз салом: Ман 4000 долар дорам, лекин нисфаш дар дасти қарзидорон аст, бар гардани ман адо кардани закот фарз ҳаст ё не.
2) Шахси қарзидорро гуфта мешавад: «Он 100 долар ки қарзидор буди он ро закот ба ту бахшидам?»
Академияи исломии ҲНИТ
Ҷавоб: Ассалому алайкум ва раҳматуллоҳ! Дар ин сурат агар қарздорони шумо эътироф мекунанд, ки аз ту қарздор ҳастанд, пас бар шумо дар ҳамон чаҳор ҳазор доллар закот воҷиб мешавад, вале метавонед закоти он нисферо, ки дар дасти қарздорон аст баъд аз гирифтан адо намоед.2: Ба ин шакле, ки шумо фармудед закот адо намешавад,аммо ба ин шакл дуруст мешавад, ки ба андозаи қарзе, ки болои фақир дорӣ барояш закот медиҳи ва дубора онро аз фақир ба ҷои қарзат мегирӣ.(Рад-ул-муҳтор, ҷилди 3, саҳ.225-226).
****
suhail
386) Суол; Оё зани ҳомиладор ва кудакиширмак доштагиро ба рӯзаро хурдан водор кунӣ гуноҳе дорад? Чаро ки баъзе занонро намешавад мутақоид намуд, ки ҳатто танҳо бо як сабаб иҷозати Худовандист, ки дар хурдани рӯза гуноҳе нест. Вассалому алайкум, бародарони исломӣ.
Академияи исломии ҲНИТ
Ҷавоб: Ассалому алайкум ва раҳматуллоҳ! Агар рӯза доштан барои чунин занҳо зарар овар бошад, рӯза доштан барои онҳо савоб не, балки гуноҳ дорад, бинобар ин ин масъаларо барои онҳо бо пуррагӣ бояд фаҳмонд, то дар ин маврид огоҳӣ пайдо намояд. Кори шумо расонидани ҳукми Худованд бар бандагон мебошад ва биноан савоб ҳосил мекунед, на гуноҳ.
****
Асадулло
385) Суол: Cаломи Худо бар шумо. Бигуед, ки шахсе дониста бетаҳорат ба масҷид даромада намоз хонд. Cуол бо далелаш ҷавоб гуед? Раҳмати Худованд бар шумо
Академияи исломии ҲНИТ
Ҷавоб: Ассалому алайкум ва раҳматуллоҳ! Баъзе аҳли илм бар ин назаранд, ки шахсе қасдан бидуни вузӯ намоз бихонад ин чунин шахс кофир мешавад, зеро бар ин фаризаи илоҳӣ истиҳзо кардааст.
Аммо ҷумҳури аҳли илм бар ин назаранд, ки инчунин шахс кофир намешавад. Имом навовӣ дар шарҳи Муслим менависад: “Агар шахсе қасдан беузр бидуни вузӯ намоз бигузорад, назди ҷумҳури аҳди илм кофир намешавад. Ва аз имом Абуҳанифа ҳикоят шудааст, ки ин шахс бо ин амалаш кофир мешавад, зеро авомири илоҳиро ба бозӣ гирифтааст”.
Бадриддини Айнӣ яке аз уламои аҳноф дар шарҳи Абудовуд менависад, ки шахсе қасдан бидуни вузӯ намоз бихонад, гунаҳкор мешавад, вале кофир намешавад.
****
МУСЛИМА
384) Суол: Ассалому алайкум!
Агар зан дар ҳолти ҳайз бошад метавонад аз Парвардигор тариқи асмои ҳусно дуо кунад ё дар ин муддат ҳеҷ дуое намекунад. Бисёр минатдор мешавам барои ҷавоби саҳеҳ. Худованд ҳамаи моро бо эмони комил мушарраф гардонад. Омин.
Академияи исломии ҲНИТ
Ҷавоб: Ассалому алайкум ва раҳматуллоҳ! Бале зан дар ҳолати ҳайз метавонад чунин дуъоҳоро бикунад.
