Имрӯз, 19-уми сентябри 2013 Ҳизби наҳзати исломии Тоҷикистон алайҳи Кумитаи телевизион ва радиои кишвар барои “фаъолиятҳои сиёҳкунанда” бар зидди ҲНИТ ба суди ноҳияи И. Сомонӣ муроҷиат карда, он “ташвиқоту тарғибот нисбати ҲНИТ”-ро қатъ карда, аз ҲНИТ расман узрхоҳӣ намоянд.
Аризаи даъвогии ҲНИТ бо имзои раиси он, Муҳиддин Кабириро Суди ноҳияи И. Сомонии шаҳри Душанбе таслим намуд.
Дар ин аризаи даъвогӣ омадааст: “Вақтҳои охир бо наздик шудани маъракаи интихоботии Президенти ҶТ аз тарафи мақомоти мазкури телевизион ва радиои давлатии ҶТ ташвиқу тарғиботи зидди ҲНИТ ба роҳ монда шудааст, ки ин рафтор ва кирдори онҳо бар хилофи талаботҳои моддаи 26 ва 28-и Сарқонуни ҶТ мебошад.”
Вохурии Президент бо ходимони динро, ки дар он рӯҳониён алайҳи ҲНИТ суханронӣ намуданд, ёдовар шуда, дар ариза омадааст, ки роҳбарияти ҲНИТ фишори афзоянда болои ҳизбро ба рӯҳияи “Протоколи 32-20” созгор донистааст.
Сипас, дар ин аризаи даъвогӣ мисолҳо ва далелҳое аз корзори расонаии ҳукумат, мисли баромади Асрор Булбулов аз Хоруғ, Ёрмуҳаммад Пиров аз Қубодиён ва дигар мисолҳоро зикр карда, омадааст, ки тамоми кушиши ВАО-и давлатӣ танҳо барои резонидани эътибори ҲНИТ равона карда шудааст.
Инчунин, дар ин ариза мактуби роҳбарияти ҳизб алайҳи Кумитаи телевизион ва радиои кишвар аз 31.07.2013 ва ҷавобҳои ин кумитаро ёдовар мешавад.
Бинобар ин, ҲНИТ дар асоси гуфтаҳои боло ва бо дастрасии моддаҳои 30-и Сарқонуни ҶТ, Қонуни ҶТ “Дар бораи телевизион ва радиошунавонӣ”, Қонуни ҶТ “Дар бораи ҳизбҳои сиёсӣ ва Қонуни ҶТ “Дар бораи матбуот ва дигар воситаҳои ахбори омма” аз суд ду хоҳиш менамояд:
Якум, аризаи даъвогии ҲНИТ нисбати ҷавобгар – кумитаи мазкур ва ҳамҷавобони дигар (“Сафина, Шабакаи аввал ва “Ҷаҳоннамо”), ба истеҳсолоти судӣ қабул карда шавад.
Дуюм, ҷавобгар ва ҳамҷавобон уҳдадор карда шаванд, ки ташвиқоту тарғибот нисбти ҲНИТ қатъ карда шавад ва аз ҲНИТ расман узрхоҳӣ намоянд.
Манбаъ: Сомонаи Наҳзат
